著名填詞人鄭國江（鄭老師）䇄立香港樂壇55年，撰寫的廣東歌歌詞超過2千多首，為表揚鄭老師在樂壇的貢獻，將於5月15日至17日（星期五、六、日）假灣仔伊利沙伯體育館表演場，舉行作品展《鄭國江詞名一生紀念群星演唱會2026》。參與演出歌手多達15位，包括5月15日演出：區瑞強、林子祥、葉振棠、周國豐、李思捷、李紫昕、Vincie；5月16日演出：區瑞強、鍾鎮濤、肥媽Maria Cordero、黎瑞恩、曾路得、李紫昕、Vincie，以及5月17日演出：區瑞強、譚詠麟、陳美齡、林志美、露雲娜、李紫昕，昨日（4月14日）鄭老師與區瑞強、肥媽及鄭子誠出席記者招待會交代詳情。

　區瑞強表示邀請歌手演出《鄭國江詞名一生紀念群星演唱會2026》時，大家都一呼百應，「大家知道鄭老師開作品展，都爭相出席支持。」區瑞強指今日記者會肥媽代表電視界，他和鄭子誠代表電台界，「因為我哋專播鄭國江老師嘅歌，我哋嘅AirTime夾埋做咗80年。」區瑞強透露因鄭老師作品超過2千首，為這次演出揀歌令他相當頭痛，「我由2千幾首揀咗100隻歌出來，已經好困難，因為一個演唱會唔會唱到100首歌，所以仲要再繼續刪減先得。」區瑞強謂鄭老師的歌，影響了幾代人樂迷，肥媽都好認同，「我啲仔同孫，而家都仲聽緊鄭老師啲歌。」

　鄭子誠直言今次作品展，雖然沒份演出，但依然堅持出席支持鄭老師，「因為鄭老師喺香港樂壇當中，帶畀我哋嘅貢獻實在太大，我喺人生裏面經歷過好多高低起跌，每個階段都有鄭老師嘅歌陪住我，所以我今日要用行動來支持。」區瑞強形容鄭老師是「詞神」，作品總能夠令到歌手走紅，「佢每次都寫『中』畀啲歌手，好似譚詠麟好少唱劇集主題曲，《誰可改變》就係老師幫寫，又好似鄧麗君冇唱過廣東歌，《漫步人生路》一唱又紅，鄭老師寫親都『中』，成為佢哋好hit嘅歌，所以啲歌手同我講都好感激鄭老師。」

　肥媽雖然未有作品出自鄭老師手筆，但她直言演繹鄭老師作品能讓她養大6個兒女同17個孫，「老實講鄭老師啲歌幫我搵咗好多錢，去到全世界登台，唱鄭老師嘅歌利是都多啲，大家都唔需要睇歌詞，但我一定唔可以唱錯歌詞，因為台下每個觀眾都識得唱晒啲歌，所以我都好多謝鄭國江老師，雖然佢冇作過歌畀我灌唱片，但係我都搵到錢，仲有好似唱薰妮《故鄉的雨》，一唱『一封家書⋯⋯』台下啲觀眾會聽到喊，所以我係日日都唱緊鄭老師嘅歌，我唔唱點樣可以養大我班化骨龍呀！」

　鄭老師聽到幾位嘉賓的話，感動到喊，要用手巾抹眼淚。鄭老師謂寫了55年歌詞，從沒想過會有一定影響力，可以給人很大的力量，「我寫歌詞可能係無心插柳，但係首歌去到某個人某個時間，令到佢有好大嘅感觸，呢個係我估唔到嘅影響力，好似我試過有次同太太去尖沙咀飲茶，有個年輕人走來叫我鄭老師，佢話『我真係你教小學嘅學生來』，佢話出來工作唔如意，跟住收埋自己變成咗隱閉青年2年，但係有晚聽收音機聽到陳百強嘅《飛出去》，畀到鼓勵佢跟住第二日去買報紙搵工，一路做到而家都好好，仲見返爸爸媽媽，其實我都唔記得我寫過呢首歌，歌詞好簡單，但原來係某個情景下會令人有感觸，呢啲事係令我最感動。」

　《鄭國江詞名一生紀念群星演唱會2026》

　主辦機構：Purple Star Music PublishingLtd

　舉行日期：2026年5月15-17日（星期五、六、日）

　舉行地點：灣仔伊利沙伯體育館表演場

　購票連結:https://www.urbtix.hk/event-detail/14742/◇